Skip to main content

Treth ar ddifidendau

Printable version

1. Gwirio a oes angen i chi dalu treth ar ddifidendau

Efallai y cewch daliad difidend os ydych yn berchen ar gyfranddaliadau mewn cwmni.

Gallwch ennill rhywfaint o incwm o ddifidendau bob blwyddyn heb orfod talu treth.

Mae’r canllaw hwn hefyd ar gael yn Saesneg.

Sut rydym yn codi treth ar ddifidendau

Nid ydych yn talu treth ar unrhyw incwm o ddifidendau sydd o fewn eich Lwfans Personol (swm yr incwm y gallwch ei ennill bob blwyddyn heb orfod talu treth arno).

Cewch lwfans difidendau o £500 bob blwyddyn hefyd. Dim ond unrhyw incwm o ddifidendau sydd dros y lwfans o ran difidendau y mae angen i chi dalu treth arno.

Nid ydych yn talu treth ar ddifidendau o gyfranddaliadau mewn ISA.

Faint o dreth rydych yn ei thalu

Mae faint o dreth y byddwch yn ei thalu ar ddifidendau sydd dros y lwfans o ran difidendau’n dibynnu ar eich band Treth Incwm.

Mae’r tabl hwn yn dangos y cyfraddau rhwng 6 Ebrill 2026 a 5 Ebrill 2027. Gallwch hefyd weld cyfraddau a lwfansau ar gyfer blynyddoedd treth blaenorol (yn agor tudalen Saesneg).

Band treth Cyfradd dreth ar ddifidendau sydd dros y lwfans
Cyfradd sylfaenol 10.75%
Cyfradd uwch 35.75%
Cyfradd ychwanegol 39.35%

I gyfrifo’ch band treth, adiwch gyfanswm eich holl incwm o ddifidendau at eich incwm arall. Efallai y byddwch yn talu treth ar fwy nag un gyfradd.

Mae’n bosibl y byddwch yn gallu cael amcangyfrif o faint o dreth y mae angen i chi ei thalu ar y difidendau y byddwch yn eu cael.

Enghraifft

Yn ystod blwyddyn dreth 2026 i 2027, rydych yn cael £3,000 o ddifidendau ac rydych yn ennill cyflog o £29,570. 

Mae hyn yn rhoi cyfanswm o £32,570 o incwm i chi. 

Mae gennych Lwfans Personol o £12,570. Tynnwch y ffigur hwn oddi wrth gyfanswm eich incwm i adael yr incwm trethadwy, sef £20,000. 

Dyma’r band treth ar y gyfradd sylfaenol, felly byddech yn talu: 

  • treth o 20% ar gyflog o £17,000 
  • dim treth ar £500 o ddifidendau, oherwydd y lwfans o ran difidendau
  • treth o 10.75% ar £2,500 o ddifidendau

Gwirio a oes angen i chi roi gwybod i CThEF

Os oes gennych daliadau difidend sydd dros eich Lwfans Personol a’ch lwfans o ran difidendau sydd heb ei ddefnyddio, bydd angen i chi roi gwybod i Gyllid a Thollau EF (CThEF) am y rhain.

2. Sut i roi gwybod am dreth ar ddifidendau

Mae’n rhaid i chi roi gwybod i Gyllid a Thollau EF (CThEF) bob blwyddyn yr ydych yn cael difidendau y mae angen i chi dalu treth arnynt. 

Mae’r ffordd y byddwch yn rhoi gwybod i CThEF am ddifidendau’n dibynnu ar faint y byddwch yn ei gael.

Rhoi gwybod am dreth ar incwm o ddifidendau hyd at £10,000

Os byddwch yn anfon Ffurflen Dreth Hunanasesiad, bydd yn rhaid i chi adrodd unrhyw incwm o ddifidendau ar eich Ffurflen Dreth.  Mae’n rhaid i chi wneud hyn erbyn y dyddiad cau. 

Os nad ydych yn anfon Ffurflen Dreth Hunanasesiad, mae’n rhaid i chi roi gwybod i CThEF ar ôl diwedd y flwyddyn dreth (5 Ebrill) a chyn 5 Hydref. Gallwch wneud hyn drwy naill ai:

Nid oes angen i chi roi gwybod i CThEF os yw’ch difidendau o fewn y lwfans o ran difidendau ar gyfer y flwyddyn dreth.

Rhoi gwybod am dreth ar incwm o ddifidendau sydd dros £10,000 

Bydd yn rhaid i chi lenwi Ffurflen Dreth Hunanasesiad.  

Os nad ydych fel arfer yn cyflwyno Ffurflen Dreth, mae’n rhaid i chi hysbysu CThEF am yr angen i chi lenwi un erbyn 5 Hydref ar ôl diwedd y flwyddyn dreth (5 Ebrill) pan gawsoch yr incwm.

Gallwch roi gwybod i CThEF drwy gofrestru ar gyfer Hunanasesiad. Gwiriwch sut i gofrestru ar gyfer Hunanasesiad.