Talu rhyddhad treth Ymchwil a Datblygu (R&D) a orhawliwyd
Sut i dalu rhyddhad treth Ymchwil a Datblygu os gwnaethoch hawlio gormod.
Cyn i chi wneud taliad, bydd angen i chi roi gwybod i CThEF ynghylch rhyddhad treth Ymchwil a Datblygu (R&D) a or-hawliwyd.
Byddwn yn anfon cyfeirnod talu atoch y gallwch ei ddefnyddio i wneud taliad.
Pryd i dalu
Awgrymwn eich bod yn gwneud taliad ar gyfrif am y swm yn eich cynnig cyn pen 30 diwrnod calendr o gyflwyno’ch datgeliad. Bydd gwneud hynny yn osgoi unrhyw log pellach rhag cronni.
Os yw diwrnod 30 ar y penwythnos neu ar ŵyl y banc, gwnewch yn siŵr bod eich taliad yn dod i law CThEF erbyn diwedd y diwrnod gwaith olaf cyn hynny.
Yr hyn sydd ei angen arnoch
Mae angen eich cyfeirnod talu arnoch wrth wneud taliad. Mae’n 15 o gymeriadau ac yn dechrau gydag X.
Gallwch ddod o hyd i hwn ar y llythyr anfonodd CThEF atoch ar ôl i chi gyflwyno’ch datgeliad.
Os byddwch yn defnyddio cyfeirnod anghywir:
- bydd oedi cyn i’r taliad gael ei ddyrannu’n gywir
- byddwch yn cael nodyn i’ch atgoffa i wneud taliad
Talu ar-lein
Talwch ar-lein gan ddefnyddio un o’r dulliau canlynol:
- cymeradwyo taliad drwy’ch cyfrif banc ar-lein
- Debyd Uniongyrchol
- cerdyn debyd neu gerdyn credyd corfforaethol
Talu ar-lein drwy’ch cyfrif banc
Gallwch dalu drwy gymeradwyo taliad drwy’ch cyfrif bancio ar-lein – gallwch wneud hyn drwy ddewis yr opsiwn i dalu drwy gyfrif banc.
Bydd gofyn i chi fewngofnodi i’ch cyfrif bancio ar-lein, neu’ch cyfrif bancio symudol, i gymeradwyo’ch taliad.
Bydd angen i chi fod â’ch manylion bancio ar-lein wrth law er mwyn talu drwy’r dull hwn.
Fel arfer, bydd y taliad yn digwydd ar unwaith, ond weithiau mae’n gallu cymryd hyd at 2 awr i ymddangos yn eich cyfrif.
Talu ar-lein drwy Ddebyd Uniongyrchol
Trefnwch Ddebyd Uniongyrchol drwy’ch cyfrif ar-lein CThEF.
Bydd angen arnoch y manylion mewngofnodi a ddefnyddiwyd gennych wrth gofrestru ar gyfer y cyfrif. Os nad oes gennych fanylion mewngofnodi eisoes, byddwch yn gallu eu creu.
Mae’n rhaid i chi dalu gan ddefnyddio dull arall os ydych yn gwneud taliad sy’n fwy na £20 miliwn.
Dylech drefnu’r Debyd Uniongyrchol o leiaf 5 diwrnod gwaith cyn y dyddiad rydych am i’ch taliad gael ei gasglu.
Dim ond os ydych wedi cofrestru ar gyfer un neu fwy o’r gwasanaethau canlynol y gallwch ddefnyddio’r gwasanaeth hwn:
- Hunanasesiad Ar-lein
- TWE Ar-lein i gyflogwyr
- Treth Gorfforaeth Ar-lein
- CIS Ar-lein
- Toll Peiriannau Hapchwarae ar-lein
Talu â cherdyn debyd neu gerdyn credyd corfforaethol
Gallwch wneud taliad yn llawn ar-lein drwy ddefnyddio cerdyn debyd neu gerdyn credyd corfforaethol. Bydd ffi na ellir ei had-dalu yn cael ei chodi os ydych yn talu drwy’r naill neu’r llall o’r dulliau hyn. Ni allwch dalu â cherdyn credyd personol.
Bydd eich taliad yn cael ei dderbyn gennym ar y dyddiad y byddwch yn ei wneud, ac nid y dyddiad y mae’n cyrraedd cyfrif CThEF (gan gynnwys penwythnosau a gwyliau banc).
Mae’n rhaid i chi sicrhau bod y manylion rydych wedi’u nodi’n cyd-fynd â’r rheiny sydd gan eich banc neu ddarparwr y cerdyn. Er enghraifft, dylai’r cyfeiriad bilio gyd-fynd â’r cyfeiriad y mae’ch cerdyn wedi’i gofrestru iddo ar hyn o bryd.
Talu drwy drosglwyddiad banc
Os byddwch yn talu drwy CHAPS (System Dalu Awtomataidd y Tŷ Clirio) neu Daliadau Cyflymach, gallwch gyflwyno’ch taliad ar yr un diwrnod, neu’r diwrnod nesaf.
Os byddwch yn talu drwy Bacs (System Glirio Awtomataidd y Bancwyr), dylech ganiatáu 3 diwrnod gwaith i’ch taliad gyrraedd CThEF.
Cyn i chi dalu, rydym yn argymell eich bod yn gwirio amserau prosesu’ch banc a’i derfynau o ran trafodion mwyaf.
Y manylion cyfrif i’w defnyddio os yw’ch cyfrif yn y DU
Defnyddiwch y manylion canlynol i wneud taliad os yw’ch cyfrif yn y DU:
- cod didoli — 08 32 10
- rhif y cyfrif — 12001020
- enw’r cyfrif — HMRC Shipley
Y manylion cyfrif i’w defnyddio os yw’ch cyfrif dramor
Defnyddiwch y manylion canlynol i wneud taliad os yw’ch cyfrif dramor:
- rhif y cyfrif (IBAN) — GB03 BARC 2011 4783 9776 92
- Cod Adnabod y Busnes (BIC) — BARCGB22
- enw’r cyfrif — HMRC Shipley
Dylech wneud pob taliad dramor mewn punnoedd sterling (GBP). Mae’n bosibl y bydd eich banc yn codi tâl arnoch os byddwch yn defnyddio unrhyw arian cyfred arall.
Os bydd angen, gallwch roi’r cyfeiriad canlynol fel cyfeiriad bancio CThEF i’ch banc chi:
Barclays Bank Plc
1 Churchill Place
London
Y Deyrnas Unedig
E14 5HP
Ar ôl i chi dalu
Byddwn yn ysgrifennu atoch yn fuan i roi gwybod i chi a ydym wedi derbyn eich datgeliad. Bydd rhagor o wybodaeth ynghylch faint o amser y bydd hyn yn ei gymryd ar y llythyr a gawsoch sy’n cynnwys eich cyfeirnod talu.
Os nad ydym yn derbyn eich datgeliad, bydd CThEF yn cysylltu â chi i roi gwybod i chi beth yw’r camau nesaf.
Os na allwch dalu’r swm llawn
Cysylltwch â CThEF os na allwch dalu’r swm llawn sydd arnoch cyn gynted ag y byddwch yn cael eich cyfeirnod talu. Gallwch ddod o hyd i’r cyfeirnod talu a manylion cyswllt CThEF yn eich llythyr.