Canllawiau

Cofrestru gyda’r rhoddwr IDs yn y DU os yw’ch busnes yn ymwneud â chyflenwi cynhyrchion tybaco

Sefydlwch gyfrif gyda’r rhoddwr IDs yn y DU ar gyfer IDs busnes neu IDs cynhyrchion, os ydych yn ymwneud â chyflenwi cynhyrchion tybaco yn y DU.

• Gan: Cyllid a Thollau EF
• Cyhoeddwyd: 1 Mai 2019
• Diweddarwyd ddiwethaf: 8 Awst 2023
  Show all updates

  1. 8 Awst 2023

     Added translation.

  2. 10 Gorffennaf 2023

     Added a link to the UK tobacco track and trace guidance from the when your economic operator ID may be deactivated section.

  3. 1 Gorffennaf 2022

     We have replaced all links and references to De La Rue with Dentsu Tracking, who are now responsible for registering and issuing ID codes to businesses in the tobacco supply chain.

  4. 31 Rhagfyr 2020

     This page has been updated because the Brexit transition period has ended.

  5. 20 Mai 2019

     Information about when your economic operator ID may be deactivated has been added to the 'After you've registered' section.

  6. 1 Mai 2019

     First published.

Mae’n rhaid i’r holl becynnau o sigaréts a thybaco rholio â llaw sy’n cael eu gweithgynhyrchu neu eu mewnforio yn y DU:

• cynnwys dynodyddion unigryw (UIDs) ar y deunydd pacio
• diogelwch penodol ar y deunydd pacio, os ydynt yn cael eu gweithgynhyrchu neu eu mewnforio ar gyfer marchnad y DU cynnwys 5 o nodweddion
• cael eu sganio ar bwyntiau penodol o fewn y gadwyn gyflenwi

Pwy ddylai gofrestru

Mae angen i chi gofrestru â’r rhoddwr IDs os ydych yn: 

• gweithgynhyrchu neu fewnforio cynhyrchion tybaco (yn Saesneg)
• storio cynhyrchion tybaco mewn warws neu’n eu gwerthu i’r fasnach neu i’r cyhoedd  (yn Saesneg)
• trawslwytho cynhyrchion tybaco (yn Saesneg) (eu symud o un cerbyd i un arall)

Ar ôl cofrestru gyda’r rhoddwr IDs yn y DU, gallwch gael:

• UIDs ar gyfer unedau ac UIDs cyfansymiol (yn Saesneg) ar gyfer eich cynhyrchion tybaco os ydych yn weithgynhyrchwr neu’n fewnforiwr
• ID Gweithredwr Economaidd
• IDs cyfleusterau ar gyfer pob safle lle rydych yn gweithgynhyrchu, yn storio neu’n gwerthu’ch cynhyrchion
• IDs peiriannau ar gyfer pob peiriant a ddefnyddir yn y broses weithgynhyrchu

Pryd i gofrestru

Mae angen i chi gofrestru cyn i chi brynu, storio neu drawslwytho sigaréts neu dybaco rholio â llaw. Mae’n rhaid i chi:

• bod wedi’ch cofrestru gyda’r rhoddwr IDs yn y DU
• bod ag ID Gweithredwr Economaidd ac IDs cyfleusterau

Mae’n cymryd hyd at 2 ddiwrnod gwaith i gael eich IDs.

Yr hyn y bydd ei angen arnoch

Er mwyn cofrestru, bydd angen y canlynol arnoch:

• enw a chyfeiriad eich busnes
• eich Rhif Lleoliad Byd-eang (os oes gennych un)
• eich rhif cofrestru TAW neu’ch Cyfeirnod Unigryw y Trethdalwr (UTR) ar gyfer Treth Gorfforaeth
• eich rhif System ar gyfer Cyfnewid Data Ecséis (SEED) (os oes gennych un)
• eich cyfeiriad bilio os ydych yn bwriadu gofyn am UIDs
• eich ID Gweithredwr Economaidd os ydych yn cofrestru ar ran manwerthwr cyntaf — bydd angen i chi fod wedi cofrestru’ch busnes eich hun yn gyntaf

Sut i gofrestru

Dentsu Tracking yw’r rhoddwr IDs ar gyfer y DU. Bydd angen i chi greu cyfrif ar ei wefan er mwyn cofrestru.

Cofrestrwch nawr (yn Saesneg) ar wefan y rhoddwr IDs yn y DU.

Cod asiantaeth Dentsu Tracking yw QCUKT.

Ar ôl i chi gofrestru, mae porth gwasanaeth sy’n eich galluogi i ofyn am fanylion ar gyfer mynediad ar-lein, ac i agor tocynnau cymorth (yn Saesneg) os ydych yn un o’r canlynol:

• gweithgynhyrchwr
• mewnforiwr
• dosbarthwr mawr
• manwerthwr — nid yw hyn yn cynnwys perchnogion siopau

Ar ôl i chi gofrestru

Cewch eich ID Gweithredwr Economaidd drwy e-bost cyn pen 2 ddiwrnod gwaith.

Os bydd angen i chi wneud newidiadau i’ch manylion cofrestru, gallwch fewngofnodi i’ch cyfrif (yn Saesneg). Byddwch yn defnyddio’r cyfeiriad e-bost a ddefnyddioch wrth gofrestru ar wefan y rhoddwr IDs yn y DU, ac yn:

• cofrestru’ch cyfleuster er mwyn cael IDs cyfleusterau
• cael IDs peiriannau os ydych yn weithgynhyrchwr neu’n fewnforiwr
• prynu UIDs ar gyfer eich cynhyrchion os ydych yn weithgynhyrchwr neu’n fewnforiwr

Bydd angen eich ID Gweithredwr Economaidd a’ch ID cyfleuster arnoch bob tro y byddwch yn prynu, gwerthu neu symud cynhyrchion tybaco.

Pryd y gellir dadactifadu’ch ID Gweithredwr Economaidd

Efallai y bydd CThEF yn dadactifadu’ch ID Gweithredwr Economaidd os yw’r canlynol yn wir:

• nid ydych yn glynu at y rheolau yn yr arweiniad ynghylch cynhyrchion tybaco neu’r arweiniad ynghylch dilyn ac olrhain tybaco yn y DU (yn Saesneg)
• nid ydych wedi’i ddefnyddio ers 12 mis
• mae gennych euogfarn sydd heb ei darfod ar gyfer trosedd o dan Ddeddfau tollau tramor a chartref
• rydych wedi cael cosbau sy’n uwch na £10,000 o dan Ddeddfau tollau tramor a chartref yn ystod y 12 mis diwethaf